परराष्ट्रमन्त्री डा नारायण खड्का समक्ष संयुक्त राष्ट्रसङ्घीय जनसङ्ख्या कोष युएनएफपीए)को नेपाल कार्यालयका लागि नवनियुक्त प्रतिनिधि योङ होङले आज ओहोदाको प्रमाणपत्र प्रस्तुत गर्नुभएको छ । मन्त्री डा खड्काले होङको ओहोदाको प्रमाणपत्र ग्रहण गरेपश्चात परराष्ट्र मन्त्रालयमा आयोजित समारोहमा उहाँहरुका बीच नेपाल र युएनएफपीएबीच ५० वर्षदेखि स्थापित सम्बन्धका विविध आयाममाथि कुराकानी भएको थियो मन्त्रालयले जनाएको छ । उहाँहरूले महिला तथा किशोरीलाई राष्ट्रिय विकासमा पूर्णतः सहभागी गराउन सशक्तीकरणका लागि बलियो साझेदारीमा जोड दिनुभएको थियो । सो अवसरमा मन्त्री खड्काले भन्नुभयो, “कोभिड–१९ को महामारी र अशान्तिले विश्वव्यापीरुपमा असमानता र गरिबीलाई बढाइदिएको छ । यसले सबै नागरिक, विशेष गरी महिला तथा किशोरीलगायत जोखिममा परेका समूहको गुणस्तरीय सेवामा पहुँच बढाउन युएनएफपीएजस्ता साझेदार संस्थासँगको रणनीतिक समन्वय र सहकार्यको आवश्यकता छ ।” सो अवसरमा नेपाल प्रतिनिधि होङले युएनएफपीएको ‘म्यान्डेट’प्रति नेपालको बलियो समर्थन र सन् २०१९ मा आयोजित ‘नैरोबी ग्लोबल समिट’मा जनसङ्ख्या तथा विकाससम्बन्धी अन्तर्राष्ट्रिय सम्मेलन (आइसिपिडी)को ‘भिजन’प्रति नेपाल सरकारले दोहो¥याएर व्यक्त गरेको प्रतिबद्धताको प्रशंसा गर्नुभयो । उहाँले नेपालमा यौन तथा प्रजनन स्वास्थ्य अधिकारको सुधारमा सरकारले गर्ने प्रयासमा युएनएफपीएको सहयोग रहने प्रतिबद्धता दोहो¥याउनुभयो । नेपाल प्रतिनिधि होङले दिगो विकासका लक्ष्य तथा आइसिपिडीको केन्द्रमा रहेको ‘तीन शून्य’ (परिवार नियोजनका साधनको पूरा हुन नसकेका (अपरिपूर्त) माग शून्यमा झार्ने, रोक्न सकिने मातृमृत्युको अवस्था शून्यमा झार्ने, र लैङ्गिक हिंसा र बालविवाहजस्ता हानिकारक अभ्यास शून्यमा झार्ने) परिणाम हासिल गर्नका लागि दृढ सङ्कल्प व्यक्त गर्नुभयो । “युएनएफपिएले रुपान्तरणकारी ‘तीन शून्य’को उपलब्धि हासिल गर्न विश्वव्यापीरुपमा महत्वकाङ्क्षी लक्ष्य तय गरेको छ, र यी लक्ष्य नेपालका लागि हाम्रो प्राथमिकता हुन् । नेपालमा हामी यी लक्ष्यहरूप्रति दृढतापूर्वक प्रतिबद्ध छौँ र महिला तथा किशोरीका लागि यौन तथा प्रजनन स्वास्थ्य अधिकार र समाजमा सक्रिय भूमिका निर्वाह गर्न हानिनोक्सानीरहितको जीवन बाँच्ने अधिकार सुनिश्चित गर्न हामी काम गर्नेछौँ । नेपाल सरकारसँगको साझेदारीलाई निरन्तरता दिन हामी तत्पर छौँ”, उहाँले भन्नुभयो । होङले युएनएफपिए नेपाल प्रतिनिधिको जिम्मेवारी सन् २०२२ जुलाई ११ देखि सम्हाल्नुभएको हो । अन्तर्राष्ट्रिय विकासमा १६ वर्षभन्दा धेरै अनुभव सङ्गाल्नुभएका होङ दक्षिण कोरियाको नागरिक हुनुहुन्छ । नेपाल प्रतिनिधिको जिम्मेवारी सम्हाल्नुअघि उहाँ मलावीको युएनएफपिए प्रतिनिधि, र यसअघि मोजाम्वीकमा ‘डेपुटी’ प्रतिनिधि हुनुहुन्थ्यो ।रासस