संस्कृति, पर्यटन तथा नागरिक उड्डयनमन्त्री जीवनराम श्रेष्ठले पुस्तक प्रदर्शनीले अद्येता एवं अनुसन्धानकर्तालाई सहयोग पु¥याउने बताउनुभएको छ । आइतबार नेपाल ललितकला प्रज्ञा–प्रतिष्ठानद्वारा आज आयोजित पुस्तक प्रदर्शनीको उद्घाटन गर्दै उहाँले पुस्तकालय र पुस्तक प्रदर्शनी नहुँदा अद्येता तथा अनुसन्धानकर्तालाई गाह्रो पर्ने गरेको अनुभव सुनाउँदै यस किसिमको प्रदर्शनीले लक्षित व्यक्तिलाई ठूलो योगदान गर्ने बताउनुभयो । “यो प्रदर्शनीले मूलतः कलाकारिताको क्षेत्रमा चासो राख्ने, विद्यार्थी, अध्येता र अनुसन्धानकर्ताका लागि महत्वपूर्ण भूमिका खेल्छ । प्रतिष्ठानले आफ्ना विविध काममध्ये सङ्कलित पुस्तक प्रदर्शनीले प्रतिष्ठानको महत्व दर्शाउँछ ।” मन्त्री श्रेष्ठले भन्नुभयो, “पुस्तक सङ्कलत र प्रदर्शनी गर्नेजस्ता कार्यले प्रतिष्ठानको महत्वलाई थप उजागर गरेको छ ।” प्रतिष्ठानका कुलपति केके कर्माचार्यले ललितकलासम्बन्धी पुस्तक कम भइरहेको सन्दर्भमा त्यसप्रति रुचि राख्ने, अध्ययन गर्न चाहनेहरूका लागि सहयोग पुगोस् भन्ने उद्देश्यले प्रदर्शनी आयोजना गरिएको बताउनुभयो । प्रतिष्ठानका उपकुलपति गोपाल चित्रकारले ललितकलाको विकास प्रवद्र्धनका लागि प्रदर्शनी उययोगी बन्ने विश्वास व्यक्त गर्नुभयो । सो अवसरमा मन्त्री श्रेष्ठले प्रदर्शनीको अवलोकनसमेत गर्नुभएको थियो । आगामी भदौ ४ गतेसम्म सञ्चालन हुने प्रदर्शनीमा प्रतिष्ठानले प्रकाशन गरेका विभिन्न पुस्तकहरू राखिएका छन् । विभिन्न पुस्तकमा ४० देखि ६० प्रतिशत छुटको व्यवस्था मिलाइएको छ । प्रतिष्ठानको भाजुमान सभाकक्षमा सञ्चालित प्रदर्शनी बिहान ११ देखि साँझ ५ बजेसम्म खुला रहनेछ । –––रासस