हेटौंडा । आज माघ १ गते नेपाली समाजको महत्वपूर्ण सांस्कृतिक पर्व माघे सङ्क्रान्ति देशभर श्रद्धा, आस्था र हर्षोल्लासका साथ मनाइँदैछ । सूर्य धनु राशिबाट मकर राशिमा प्रवेश गर्ने दिनका रूपमा मनाइने यस पर्वलाई सूर्यउत्तरायणको प्रारम्भका रूपमा समेत लिइन्छ, जसले दिन क्रमशः लामो र रात छोटो हुँदै जाने संकेत गर्दछ।
माघे सङ्क्रान्तिका अवसरमा चाकु, तिल, घिउ, खिचडी, तरुल, सख्खर, माछा–मासु जस्ता पौष्टिक खानेकुरा खाने परम्परा छ । जाडो याममा शरीरलाई उर्जा र स्वास्थ्य प्रदान गर्ने विश्वासका साथ यी परिकारहरू सेवन गरिन्छ । माघे सङ्क्रान्तिले स्वास्थ्य, समृद्धि र दीर्घायुको कामना गर्ने अवसरका रूपमा पनि विशेष स्थान राख्दछ।
थारु समुदायले यस पर्वलाई माघी को रूपमा भव्य र ऐतिहासिक महत्वका साथ मनाउँदै आएका छन् । माघीलाई थारु समुदायको नयाँ वर्षका रूपमा लिइन्छ । यस दिन पारिवारिक जमघट, सामूहिक भोज, सांस्कृतिक नाचगान तथा आगामी वर्षका सामाजिक निर्णयहरू गर्ने परम्परा रहेको छ । माघी पर्वले समुदायभित्रको एकता, आपसी सहयोग र संस्कृतिको संरक्षणमा महत्वपूर्ण भूमिका खेल्दै आएको छ ।
माघे सङ्क्रान्ति केवल धार्मिक पर्व मात्र नभई नेपाली समाजमा सामाजिक सद्भाव, मेलमिलाप र परम्परागत जीवनशैलीको निरन्तरताको प्रतीकका रूपमा रहेको छ । यस पर्वले प्रकृतिसँगको सम्बन्ध, ऋतु परिवर्तनको महत्व र सकारात्मक सोचको सन्देश पनि प्रवाह गर्दछ ।
देशका विभिन्न स्थानमा स्थानीय तह, सामाजिक संघसंस्था तथा समुदायस्तरबाट माघे सङ्क्रान्तिको अवसरमा विविध सांस्कृतिक कार्यक्रमहरू आयोजना गरिएको छ। परम्परा र आधुनिकताको संयोजन गर्दै मनाइने यस पर्वले नेपाली पहिचानलाई थप सुदृढ बनाएको छ।
प्रतिक्रिया दिनुहोस्